پی آئی اے کا ایک اور فضائی میزبان کینیڈا میں مبینہ طور پرغائب

لاہور(ڈیلی پاکستان آن لائن)قومی ایئرلائن (پی آئی اے) ملازمین کا بیرون ملک فلائٹس پر سلپ ہونے کا سلسلہ جاری ہے۔ لاہور سے کینیڈا کی فلائٹ کے فضائی میزبان آصف نجم مبینہ طور پر غائب ہو گئے۔

نجی ٹی وی سما نیوز کے مطابق ترجمان پی آئی اے کا کہنا ہے کہ آصف نجم نے رابطہ کرنے پر طبیعت کی ناسازی کا عذر پیش کیا۔فضائی میزبان آصف نجم نے ٹورنٹو سے لاہور آنے والی پرواز پر رپورٹ نہیں کیا۔ معاملے کی جانچ کی جا رہی ہے۔

آصف نجم 16 نومبر کو لاہور سے ٹورنٹوکی پرواز سے کینیڈا پہنچا تھا، 19 نومبر کی فلائٹ سے ٹورنٹو سے کریو ممبر نے واپس لاہور پہنچنا تھا۔ آصف نجم 16 سے 19 نومبر کے دوران ہوٹل سے غائب ہوا۔

واضح رہے کہ اس سے قبل بھی پی آئی اے کے کئی ملازمین بیرون ملک لاپتا ہو چکے ہیں۔حکام کا کہنا ہے کہ غیر قانونی طور غائب ہونے کی صورت میں فضائی میزبان کے خلاف محکمانہ کارروائی کی جائے گی۔