بھارت ایک سال بعد بھی معرکہ حق میں شکست کی تلخ حقیقت کو تسلیم کرنے سے انکاری ہے، آئی ایس پی آر

راولپنڈی (ڈیلی پاکستان آن لائن) افواج پاکستان نے بھارتی فلم سندور 2 پر شدید ردعمل دیتے ہوئے کہا ہے کہ معرکہ حق کا ایک سال سے زائد عرصہ گزرنے کے بعد بھی بھارت شکست کی تلخ حقیقت تسلیم کرنے سے انکاری ہے۔

نجی ٹی وی چینل ’’ ایکسپریس نیوز‘‘ کے مطابق پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے میں کہا گیا ہے کہ بھارت ناکامی تسلیم کرنے کے بجائے تاریخ کو اپنی مرضی کے رنگ میں پیش کرنے کی کوشش کر رہا ہے، بھارتی مواد تخلیق کاروں نے نام نہاد آپریشن سندور پر انتہائی ڈرامائی، رنگین اور حقائق کے منافی بیانیے پر مبنی دستاویزی فلم تیار کی ہے۔

آئی ایس پی آر نے کہا کہ تاہم پاک فوج ملک کی خودمختاری، علاقائی سالمیت اور قومی مفادات کے دفاع کے لیے مکمل طور پر تیار اور صلاحیت رکھتی ہے۔ مستقبل میں کسی بھی فوجی مہم جوئی کا جواب بھرپور، فیصلہ کن اور غیر متناسب انداز میں دیا جائے گا، جس کے بعد کسی بھی قسم کی سنیماٹک منظرکشی بھارت کے لیے چہرہ بچانے کا باعث نہیں بن سکے گی۔