نیویارک (ڈیلی پاکستان آن لائن) فیفا ورلڈ کپ 2026 کے گروپ ایچ کے ایک دلچسپ مقابلے میں مغربی افریقہ براعظم کے ملک کیپ وردے کے تجربہ کار گول کیپر ووزینہ نے اپنی غیرمعمولی کارکردگی سے فٹبال شائقین کو حیران کر دیا۔ اسپین اور کیپ وردے کے درمیان کھیلا گیا میچ بغیر کسی گول کے برابر رہا، لیکن میدان میں سب سے زیادہ توجہ 40 سالہ گول کیپر ووزینہ نے حاصل کی، جنہوں نے 7 یقینی گول بچا کر اپنی ٹیم کو اہم ڈرا دلایا۔
نجی ٹی وی چینل ’’ آج نیوز‘‘ کے مطابق میچ کے دوران اسپین نے زیادہ تر وقت گیند پر کنٹرول برقرار رکھا اور مسلسل حملے کیے، تاہم جب بھی اسپین کے کھلاڑی دفاعی لائن توڑنے میں کامیاب ہوئے، ووزینہ ان کے راستے میں دیوار بن کر کھڑے ہو گئے۔ انہوں نے پہلے ہاف کے اختتامی لمحات میں فیران ٹوریس، پیڈری اور ایمیرک لاپورٹ کی کوششوں کو ناکام بنا کر اپنی ٹیم کو نقصان سے بچایا۔
