راولپنڈی (ڈیلی پاکستان آن لائن) حنا جاوید قتل کیس میں اعلیٰ سطح کی تحقیقاتی کمیٹی نے تفتیش مکمل کرتے ہوئے مرکزی ملزم کا تعین کر دیا۔
نجی ٹی وی چینل’’ اے آر وائی نیوز‘‘ کے مطابق تحقیقاتی کمیٹی نے حنا جاوید قتل کیس میں نامزد ملزم گھریلو ملازم ذیشان کو مرکزی ملزم قرار دے دیا۔ ملزم ذیشان کی جلد کے ذرات مقتولہ کے ہاتھوں کی انگلیوں کے ناخن میں پائے گئے۔
تحقیقاتی کمیٹی نے مقتولہ کے شوہر فیصل اصغر اور گھریلو ملازم ذیشان سے 4 مرتبہ سے زائد تفتیش کی تھی۔
واضح رہے کہ حنا جاوید کے قتل کا مقدمہ تھانہ سول لائن میں درج ہے۔ مقتولہ کا شوہر فیصل اصغر اور گھریلو ملازم ذیشان جوڈیشل ریمانڈ پر اڈیالہ جیل میں ہیں۔
