خیرپور(ڈیلی پاکستان آن لائن)سندھ کے شہر خیرپور میں افسوس ناک واقعہ پیش آیا جہاں ایک ہی خاندان کے 4 بچے نہر میں نہاتے ہوئے ڈوب کر جاں بحق ہوگئے۔
نجی ٹی وی چینل جیو نیوز کے مطابق ریسکیو ذرائع کا کہنا ہے کہ ایک ہی گھر کے 4 بچے لالن نہر میں نہانے گئے جہاں وہ ڈوب گئے۔
واقعے کے بعد امدادی کارروائیاں شروع کی گئیں اور چاروں بچوں کی لاشیں نہر سے نکال لی گئیں۔ جاں بحق بچوں کی عمریں 8 سے 12 سال کے درمیان ہیں۔
دوسری جانب وزیراعلیٰ سندھ مراد علی شاہ نے خیرپور میں پیش آنے والے اس افسوسناک واقعے پر گہرے دکھ اور افسوس کا اظہار کیا ہے۔
وزیراعلیٰ نے لاڑکانہ میں بھی 3 بچوں کے ڈوب کر جاں بحق ہونے کے واقعے پر اظہارِ افسوس کرتے ہوئے متعلقہ حکام کو متاثرہ خاندانوں سے ہر ممکن تعاون کی ہدایت کی۔
مراد علی شاہ نے ڈپٹی کمشنر خیرپور اور ڈپٹی کمشنر لاڑکانہ کو متاثرہ خاندانوں کی ہر ممکن مدد اور معاونت یقینی بنانے کی بھی ہدایت جاری کی۔
