جدہ (محمد اکرم اسد) اسلامی تتعاون تنظیم OIC کے سیکرٹری جنرل، حسین ابراہیم طہ نے اسرائیلی قابض حکام کی جانب سے مقبوضہ یروشلم میں نام نہاد "ای ون پلان" کے تحت 1,234 نئی آبادکاری یونٹس کی تعمیر کے ٹینڈر کے اعلان کی شدید مذمت کی ہے۔
انہوں نے کہا کہ یہ اقدام استعماری آبادکاری، الحاق، جبری بے دخلی اور یکطرفہ حقائق مسلط کرنے کی پالیسیوں کا تسلسل ہے جس کا مقصد مقبوضہ فلسطینی علاقے کی قانونی، سیاسی اور آبادیاتی حیثیت کو تبدیل کرنا ہے۔
سیکرٹری جنرل نے اس آبادکاری منصوبے کے سنگین خطرات سے خبردار کرتے ہوئے کہا کہ یہ منصوبہ بدوی برادریوں کی جبری بے دخلی کا باعث بنے گا اور مقبوضہ یروشلم کو اس کے فلسطینی گرد و نواح سے الگ تھلگ کرنے کی کوش ہے۔ اس کے علاوہ یہ فلسطینی زمین کے علاقائی اتحاد کو کمزور کرے گا اور دو ریاستی حل کے نفاذ کے لیے کی جانے والی بین الاقوامی کوششوں میں رکاوٹ ڈالے گا۔
