کراچی(ڈیلی پاکستان آن لائن) ایف سی ایریا کے سرکاری فلیٹ سے 65 سالہ خاتون کی تشدد زدہ گلا کٹی لاش ملی، مقتولہ کو پتھر سے تشدد کا نشانہ بنانے کے بعد گلا کاٹنے کی کوشش کی گئی تھی، مقتولہ 5 بچوں کی ماں تھی۔
نجی ٹی وی چینل ایکسپریس نیوز کے مطابق مقتولہ کا شوہر گزشتہ کئی سالوں سے الگ رہائش پذیر تھا، عباسی شہید ہسپتال میں لیڈی ایم ایل او کی عدم دستیابی کے باعث لاش کئی گھنٹوں تک بے یارو مددگار پڑی رہی، ایم ایل او نے بھی میڈیا کے سوالوں کا جواب دینے سے انکار کر دیا۔
تفصیلات کے مطابق شریف آباد کے علاقے آباد ایف سی ایریا بلاک 55/15 کی رہائشی خاتون کی فلیٹ سے تشدد زدہ گلا کٹی لاش ملی، اطلاع ملنے پر پولیس موقع پر پہنچ گئی اور جائے وقوعہ سے شواہد اکھٹے کرنے کے بعد لاش قانونی کارروائی کے لیے عباسی شہید ہسپتال منتقل کی۔
ایس ایچ او کا کہنا تھا کہ خاتون کی لاش بدھ کی صبح قانونی کارروائی کے بعد ورثا کے حوالے کر دی گئی، ورثا تدفین کے بعد مقدمہ درج کروانے آئیں گے۔
