لاہور (ڈیلی پاکستان آن لائن) پاکستان پیپلز پارٹی (پی پی پی) ویمن ونگ کی صدر فریال تالپور نے پنجاب میں پارٹی سیاسی طور پر کمزور نہیں ہے، میں پارٹی امور کی نگرانی، تنظیم کو مضبوط بنانے اور کارکنوں کے ساتھ براہِ راست رابطے میں رہنے کے لیے آئی ہوں۔
نجی ٹی وی چینل ’’ایکسپریس نیوز‘‘ کے مطابق لاہور میں صحافیوں سے گفتگو کرتے ہوئے فریال تالپور نے کہا کہ وہ پی پی پی پنجاب کی قیادت کی دعوت پر آئی ہیں۔ انہوں نے اس بات پر زور دیا کہ پارٹی کی موجودگی پورے ملک میں ہے اور وہ پنجاب میں اپنی پوزیشن کو مستحکم کرنے کے لیے پرعزم ہے۔ انہوں نے مزید کہا کہ ان کے دورے کا مقصد کارکنوں اور رہنماؤں سے ملاقات کرنا اور تنظیمی امور کا جائزہ لینا ہے۔
پارٹی حلقے ان کے اس دورے کو پیپلز پارٹی کے تنظیمی نیٹ ورک کو مضبوط بنانے، قیادت اور کارکنوں کے درمیان ہم آہنگی کو بہتر کرنے، اور پنجاب میں سیاسی سرگرمیوں کو تیز کرنے کے ایک اہم موقع کے طور پر دیکھ رہے ہیں۔
