لاہور(ڈیلی پاکستان آن لائن) نویں محرم الحرام کے موقع پر پانڈو اسٹریٹ، اسلام پورہ سے خیمہ سادات تک نکلنے والے جلوس کے لیے لاہور ٹریفک پولیس نے مکمل انتظامات مکمل کر لیے ہیں۔ اس حوالے سے سی ٹی او لاہور سید عبدالرحیم شیرازی نے بتایا کہ ٹریفک کی روانی کو برقرار رکھنے اور شہریوں کی سہولت کے لیے خصوصی پلان ترتیب دیا گیا ہے، جس کی نگرانی ایس پی سٹی مقصود لون خود کریں گے۔
سی ٹی او لاہور کا کہنا ہے کہ ٹریفک کی بندش کے حوالے سے تمام تر اقدامات عارضی نوعیت کے ہوں گے اور جلوس کی گزر گاہوں پر ٹریفک کو جلوس کی موومنٹ کے ساتھ ساتھ ہی متبادل راستوں پر منتقل کیا جائے گا، جبکہ جلوس گزرتے ہی سڑکوں کو فوری طور پر ٹریفک کے لیے کھول دیا جائے گا۔ انہوں نے مزید کہا کہ ایمرجنسی گاڑیوں کے لیے راستہ ہر صورت کلیئر رکھا جائے گا۔
