واشنگٹن(ڈیلی پاکستان آن لائن)امریکی صدر ڈونلڈ ٹرمپ نے آبنائے ہرمز کے قریب امریکی فوج کے ایک اپاچی ہیلی کاپٹر کے حادثے کے حوالے سے بات کرتے ہوئے کہا ہے کہ ’ہیلی کاپٹر کے دونوں پائلٹ محفوظ ہیں۔‘
بی بی سی اردو کے مطابق منگل کے روز واشنگٹن واپسی سے قبل جان ایف کینیڈی انٹرنیشنل ایئرپورٹ پر صحافیوں سے گفتگو کرتے ہوئے ٹرمپ نے کہا ’کسی بھی شخص کو کوئی نقصان نہیں پہنچا۔‘
انھوں نے مزید بتایا کہ امریکی حکومت اس واقعے کے بارے میں تفصیلی رپورٹ منگل کے روز بعد میں جاری کرے گی۔
اس سے قبل امریکی اخبار نیویارک ٹائمز نے گزشتہ شب دو باخبر ذرائع کے حوالے سے رپورٹ کیا تھا کہ آبنائے ہرمز کے قریب ایک امریکی فوجی اپاچی ہیلی کاپٹر حادثے کا شکار ہو گیا، تاہم اس میں سوار دونوں پائلٹس محفوظ رہے اور انھیں بچا لیا گیا۔
رپورٹ کے مطابق تاحال یہ واضح نہیں ہو سکا کہ ہیلی کاپٹر ایرانی فورسز کی فائرنگ کا نشانہ بنا، کسی فنی خرابی کے باعث گر کر تباہ ہوا یا حادثے کی کوئی اور وجہ تھی۔
