اسلام آباد ( ڈیلی پاکستان آن لائن )وفاقی وزیر خزانہ محمد اورنگزیب سے جرمنی کی سفیر نے اسلام آباد میں ملاقات کی اور پاکستان کی معاشی ریٹنگ اپ گریڈ ہونے پر وزیر خزانہ کو مبارکباد دی۔
تفصیلات کے مطابق اس حوالے سے جاری سرکاری اعلامیہ کے مطابق ملاقات میں پاکستان میں جرمن کمپنیوں کے کردار اور تعاون پر بھی تبادلۂ خیال کیا گیا۔
وزیر خزانہ محمد اورنگزیب نے کہا کہ پاکستان کے زرمبادلہ ذخائر میں بہتری آئی ہے، حکومت معاشی استحکام اور مالیاتی نظم و ضبط کیلئے پرعزم ہے۔ جرمن کمپنیوں کیلئے کاروباری ماحول مزید سازگار بنایا جائے گا، ایف بی آر کی ڈیجیٹلائزیشن سے ٹیکس نظام میں شفافیت بڑھے گی، ٹیکنالوجی سے ٹیکس انتظامیہ کو مزید مؤثر بنایا جا رہا ہے۔
