لاہور(ڈیلی پاکستان آن لائن)پاکستان کرکٹ ٹیم کے کپتان اور میچ کے بہترین کھلاڑی (پلیئر آف دی میچ) شاہین شاہ آفریدی نے آسٹریلیا کے خلاف شاندار کامیابی پر اللہ تعالیٰ کا شکر ادا کرتے ہوئے اسے پوری ٹیم کی مشترکہ کوششوں کا نتیجہ قرار دیا ہے۔
میچ کے بعد گفتگو کرتے ہوئے قومی کپتان کا کہنا تھا کہ پچ کی صورتحال بلے بازوں کے لیے کافی مشکل تھی لیکن میچ میں بننے والا ایک ایک رن قیمتی ثابت ہوا اور کھلاڑیوں نے جیت کے لیے بہترین کھیل پیش کیا۔ انہوں نے ہوم کنڈیشنز کی اہمیت پر زور دیتے ہوئے کہا کہ جب بھی آپ اپنے ملکی حالات اور ہوم گراؤنڈ پر کھیلتے ہیں تو ہمیشہ اس کا بھرپور فائدہ اٹھانے کی کوشش کرتے ہیں۔ شاہین شاہ آفریدی نے ماضی کا تذکرہ کرتے ہوئے یاد دلایا کہ جب ہماری ٹیم نے آسٹریلیا کا دورہ کر کے وہاں سیریز جیتی تھی، تو وہاں کے حالات فاسٹ باؤلنگ کے لیے سازگار تھے جس کا ہم نے فائدہ اٹھایا تھا۔
