سوات(ڈیلی پاکستان آن لائن)سوات کی تحصیل کبل اور مٹہ کی پہاڑی چوٹی شلخو سر میں پولیس اور سی ٹی ڈی کے دہشتگردوں کے خلاف آپریشن کے دوران متعدد دہشت گرد ہلاک اور کئی زخمی ہوگئے۔
نجی ٹی وی سما نیوز کے مطابق پولیس اہلکاروں اور سی ٹی ڈی نے دہشتگردوں کو گھیرے میں لے کر محصور کرلیا۔دو طرفہ فائرنگ کے تبادلے میں متعدد دہشتگرد انجام کو پہنچے جبکہ ان کے کئی ساتھی زخمی بھی ہوئے۔
ترجمان پولیس کے مطابق شلخو سر میں دہشت گردوں اور پولیس کے درمیان شدید جھڑپ میں ایک پولیس اہلکار بھی شہید ہو گیا ہے۔
ترجمان پولیس کے مطابق دہشتگردوں سے مقابلہ ابھی جاری ہے۔ آر پی او مالاکنڈ اور ڈی پی اوز براہ راست آپریشن کی نگرانی کر رہے ہیں۔ پولیس حکام نے امن کے قیام کے لیے کارروائیاں جاری رکھنے کے عزم کا اظہار کیا ہے۔
