کراچی(ڈیلی پاکستان آن لائن)اورنگی ٹاؤن نمبر 10 کے قریب فائرنگ کا واقعہ پیش آیا ہے، جس کے نتیجے میں ایک شخص جاں بحق اور دو افراد زخمی ہو گئے ہیں۔
نجی ٹی وی چینل اے آر وائی نیوز کے مطابق ریسکیو حکام کا کہنا ہے کہ فائرنگ میں جاں بحق ہونے والے شخص کی شناخت 45 سالہ فیصل عباسی کے نام سے ہوئی ہے، جن کی لاش کو ضابطے کی کارروائی کے لیے عباسی شہید اسپتال منتقل کر دیا گیا ہے۔
پولیس کا کہنا ہے کہ مقتول فیصل عباسی ایک سیاسی جماعت کے یوسی 20 اورنگی ٹاؤن کے عہدیدار تھے۔
واقعے میں زخمی ہونے والے دیگر دو افراد کی شناخت فہد جمالی اور فہد عباسی کے نام سے ہوئی ہے، جنہیں فوری طور پر طبی امداد کے لیے ہسپتال منتقل کر دیا گیا ہے۔
پولیس کے مطابق ابتدائی تحقیقات کے مطابق فائرنگ کا یہ واقعہ ذاتی دشمنی کا معلوم ہوتا ہے، تاہم واقعے کی مختلف پہلوؤں سے تفتیش کی جا رہی ہے۔
