اسلام آباد(ڈیلی پاکستان آن لائن)پاکستان اور بھارت نے سفارتی ذرائع سے ایک دوسرے کی تحویل میں موجود قیدیوں کی فہرستوں کا تبادلہ کیا ہے۔
نجی ٹی وی چینل اے آر وائی نیوز کے مطابق ذرائع کا کہنا ہے کہ یہ بیک وقت تبادلہ دونوں ممالک کے مابین 2008 میں طے پانے والے قونصلر رسائی کے معاہدے کے تحت عمل میں لایا گیا ہے۔ اس معاہدے کے تحت پاکستان اور بھارت ہر سال یکم جنوری اور یکم جولائی کو اپنے ہاں قید دوسرے ملک کے شہریوں کی فہرستیں شیئر کرنے کے پابند ہیں۔
طے شدہ طریقہ کار کے تحت پاکستان میں قید بھارتی قیدیوں کی فہرست اسلام آباد میں موجود بھارتی ہائی کمیشن کے نمائندے کے حوالے کی گئی۔
جبکہ بھارتی جیلوں میں قید پاکستانی شہریوں کی فہرست نئی دہلی میں پاکستانی ہائی کمیشن کے سپرد کی گئی۔ دونوں ممالک کے مابین یہ باقاعدہ تبادلہ دوطرفہ قونصلر روابط کو برقرار رکھنے کا ایک اہم حصہ ہے۔
